Verkstad om litteratur som oppleving med dei yngste
Målgruppe: barnehage og bibliotek.
Pris: gratis, inkludert lunsj
Tid: kl. 10-14
Vel dato og stad som passar for deg:
Bergen 16. eller 19.november, på Stord 17.november eller Voss 18.november.
Vi arrangerer òg verkstader i den sørlege delen av fylket (Sogndal, Sandane og Førde). Sjå eigen arrangementsside for informasjon og påmelding.
Spørsmål? Ta kontakt med Astrid Sundset Moe
Om verkstaden:
Gode bøker er fulle av moglegheiter for opplevingar, leik og inkludering – men korleis identifiserer vi dei, og korleis deler vi dei med barna? Det er akkurat det vi skal utforske saman på denne verkstaden. Konklusjonen kan vi allereie avsløre: som formidlar av bøker må vi kaste oss ut i det og prøve oss fram – og det er akkurat det vi gjer her, saman og i trygge rammar.
Denne verkstaden er for deg som formidlar bøker til barn mellom 0 og 6 år – anten du er ny og vil prøve deg, eller erfaren og vil utvikle deg vidare.
Kva skjer på verkstaden?
På verkstaden møter du eit utval gode og spennande bildebøker for dei aller yngste og dei litt eldre. To og to jobbar de saman om å utvikle ein formidling frå ein eller to bøker – og så framfører de for ei lita gruppe. Du går heim med to ferdige formidlingsopplegg du kan bruke, og du har fått presentert fleire nye bøker av andre deltakarar.
Kvifor er dette viktig?
Barn som møter bøker tidleg, får eit forsprang – språkleg, sosialt og kulturelt. Men ikkje alle barn møter bøker heime. Barnehage og bibliotek er dei viktigaste arenaene for at alle barn skal få denne opplevinga, uavhengig av bakgrunn. Det er eit felles ansvar – og det krev at vi jobbar saman og held kompetansen ved like.
Vestland fylkeskommune arrangerer desse regionale verkstadane som del av oppfølginga av leselyststrategien Saman om lesing (2024–2030), der styrking av samarbeid mellom barnehage og bibliotek er eit sentralt tiltak.
Gode praksisdøme?
Har du eller kjenner du nokon som har gode praksisdøme frå formidling til barnegruppa 0-6 år? Og vil de dele det med andre? Ta kontakt med oss – vi ønskjer å gi rom til gode praksisdøme på verkstadane.